Infanoj Ĉirkaŭ la Mondo

Charlotte KOHRS mortis

Charlotte Irwin Kohrs, fondintino de "Infanoj Ĉirkaŭ la Mondo" kaj ĝia Direktorino dum multaj jaroj, mortis je la 31-a de julio 2002 ĉe sia hejmo en San-Diego, Kalifornio. Ŝi naskiĝis en 1910 en New Haven, Konektikuto sed pasis plejparton de sia juna vivo en Berkeley, Kalifornio kie ŝia patro, kiu scipovis dek unu lingvojn, estis Profesoro pri Matematiko en la Universitato de Kalifornio.

Charlotte tre interesiĝis pri la instruado de Esperanto al infanoj post la morto de sia edzo Lewis en 1982. Ŝi verkis "malgrandajn librojn" por infanoj, inkluzive de

• ABC EN ESPERANTO,
• LA BELA PLANEDO,
• DEK DEMANDOJ,
• DEK FABELOJ,
• FLUGU KUN PETRO,
• NI ESPLORU LA MONDON, and
• NI PAROLU ESPERANTE KUNE.

Ŝi ankaŭ komponis dek du konversaciajn kantojn por lernantoj. Ili estis eldonataj en libreto

• KANTU ESPERANTE kaj estis eldonataj ankaŭ kiel son-kasedo
• KANTU ESPERANTE KUN JANICO KAJ JOHANO.

Ŝi ankaŭ redaktis, eldonis, kaj distribuis tra la mondo dum kelkaj jaroj novaĵleterojn por "Infanoj Ĉirkaŭ la Mondo." Pro ŝia granda laboro por Esperanto Charlotte estis nomata "Honora Membro" de la Esperanto-Ligo de Nord-Ameriko en 1999. Dum ŝiaj lastaj jaroj, Charlotte ricevis multe da helpo pri Esperanto-aferoj de Jim Faughnan.

Dum du jaroj Charlotte studis ĉe Mills College, sed poste ŝi diplomiĝis ĉe la Universitato de Viskonsino. Iam ŝi revis pri kariero kiel konĉerta pianisto, sed anstataŭe dum la Granda Depresio ŝi laboris kiel profesia socio-helpisto en Novjork-Urbo. Poste ŝi havis postenojn kiel instruisto de antaŭ-lernejaj infanoj kaj iliaj gepatroj, mez-lerneja instruisto (tiam ŝi kelkfoje instruis tiujn kiuj havas mensaj problemoj), kaj lerneja parol-terapiisto. Ŝi ofte uzis pupojn por instrui infanojn. Ŝi kreis specialan bild-vortan lingvon por helpi infanojn, kiuj havas leg-problemojn. Ŝi ankaŭ verkis libretojn kaj pup-teatraĵojn por ĉiuj infanoj.

Charlotte havis ses gefratojn, du el kiuj (Elly kaj Richard) ankoraŭ vivas. Ŝi havis du idojn, Molly Kohrs McConnell (bibliotekisto pri libroj por infanoj) kaj Chris Kohrs (komputilisto); tri genepojn, Cathleen (kiu instruas infanojn pri la medio ĉe publika akvariego), Paul (kiu studas iĝi psikologo), kaj Christopher (kiu studas iĝi geologo); kaj unu pranepo Tharyn (ses jar-aĝa).

Charlotte amis infanojn, naturon, muzikon, kartludojn, kaj vortludojn. Ŝi estis tre optimisma persono kiu opiniis, ke unu persono povas plibonigi la socion kaj la mondon. Ŝi helpis multajn aliulojn, aparte infanojn, dum sia vivo. Ŝiaj specialaj daŭraj donacoj al ni estas siaj libretoj kaj kantoj por instrui Esperanton al infanoj tra la tuta mondo. Tiuj materialoj, kiujn ŝi produktis, haveblos ĉe la nova ret-paĝo por "Infanoj Ĉirkaŭ la Mondo" ĉe la nova adreso

    http://www.icxlm.org

Kontribuojn por honori ŝin oni povas doni al la "Fonduso por Infanoj Ĉirkaŭ la Mondo" ĉe ELNA (P.O. Box 1129, El Cerrito CA 94530) aŭ al "Freedom from Hunger" (1644 DaVinci Ct., Davis CA 95617).